Ысык-Көл индустриалдык-педагогикалык колледжинде «Билим берүү сапаты — санариптик технологиялар менен!» деген ураан алдында мастер-класс болуп өттү. Бул иш-чарага Нарын педагогикалык колледжинин ПОВТАС адистигинин окутуучулары жана студенттери атайын келишип, заманбап билим берүү ыкмалары боюнча баалуу тажрыйба бөлүштү.
Иш-чаранын алкагында мугалимдердин тажрыйбасына өзгөчө көңүлдү бурду:
Ырыскүл Токтосунова — санариптик ресурстардын билим берүүдөгү орду тууралуу терең ойлорун бөлүшүп, технологиянын мугалим менен окуучунун байланышын бекемдөөдө тийгизген таасирин белгилеп өттү. Гүланда Байдөөлөтова — Smart board интерактивдүү доскасын колдонуу мүмкүнчүлүктөрүн практикалык негизде көрсөтүп, сабакты кызыктуу жана натыйжалуу өткөрүүнүн ыкмалары менен тааныштырды. Бексултан Турдиев — программалоо жана веб-сайт түзүү багытында мастер-класс өткөрүп, билим берүү платформаларын заманбап талаптарга ылайык колдонуу жолдорун тажрыйба аркылуу баяндап берди. Студенттердин активдүү катышуусу иш-чараны дагы да мазмундуу кылды.ПОВТАС адистигинин студенттери — Эркай Тынымсейитова, Аида Турдубекова жана Аида Арстанбековалар — өз колдору менен ишке ашырган долбоорлорун презентациялап, санариптик технологияларды билим берүүдө колдонуу канчалык натыйжалуу экенин иш жүзүндө далилдей алышты.
Эки окуу жай ортосундагы кызматташтык дагы бир деңгээлге көтөрүлдү.Иш-чаранын соңунда Нарын педагогикалык колледжинин окуу иштери боюнча директордун орун басары Жылдыз Кадырова жана Ысык-Көл индустриалдык-педагогикалык колледжинин директору Жыпара айым өз ара кызматташуу тууралуу меморандумга кол коюшту.
Бул жолугушуу эки окуу жай үчүн жаңы мүмкүнчүлүктөрдү ачып, мугалимдер менен студенттерге санариптик багытта өсүп-өнүгүүгө, жаңы дем-күч алууга жана чыгармачыл ой жүгүртүүгө түрткү берди.
